.
Бо мақсади дар сатҳи муносиб таҷлил намудани «Рӯзи байналмилалии мубориза бар коррупсия» 2 октябри соли 2024 бо ташаббуси Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар Қасри фарҳанги ноҳияи Варзоб семинари омӯзишӣ таҳти унвони «Муқовимат ба коррупсия - кори дастаҷамъист» доир гардид.
Дар чорабинӣ намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон, масъулини Мақомоти иҷроияи ҳокимияти давлатии ноҳияи Варзоб, кормандони Кумитаи иҷроияи Ҳизби Халқии Демократии Тоҷикистон, соҳаҳои маориф, тандурустӣ, фарҳанг, роҳбарони ташкилоту муассисаҳои дар ҳудуди ноҳия фаъолиятдошта, соҳибкорон, раисони кумитаҳои маҳалл, имомхатибони масҷидҳо, роҳбар ва аъзои намояндагии Ташкилоти ҷамъиятии ҷавонон «Созандогони Ватан», волонтёрони бахши кор бо ҷавонон ва варзиш, фаъолон, гирандагони стипендияи Президентӣ ширкат варзида, оид ба масъалаҳои мухталиф маърӯзаҳои пурмуҳтаво намуданд.
Аз ҷумла зикр карда шуд, ки имрӯз аҳли ҷомеа, бахусус ҷавонон дар партави сиёсати пешгирифтаи Ҳукумати Ҷумҳурии Тоҷикистон такя ба волоияти қонун намуда, ҳифзи ҳуқуқу озодиҳои инсон ва шаҳрвандонро дар мадди аввал гузошта, нагузорем, ки амалҳои номатлуб аз ҷумла коррупсия, ба кишвари азизамон таъсири манфии худро расонад.
Дар доираи чорабинии баргузоргардида, иштирокчиён атрофи масъалаи баррасишаванда саволҳо дода, вобаста ба он ҷавобҳои қонеъкунанда дарёфт намуданд.
Чоп намудан
E-mail
.
Бо гузаронидани чорабиниҳои оперативӣ - ҷустуҷӯӣ муайян карда шуд, ки Носиров Ф.С. вакили Маҷлиси вакилони халқи шаҳри Истиқлоли вилояти Суғд буда, аз 20 июли августи соли 2022 то 01 июли соли 2024 дар вазифаи Роҳбари дастгоҳи раиси шаҳри Истиқлол кор карда, дар давраи фаъолияти кориаш новобаста аз он, ки қаблан ду маротиба суд шуда буд, аз ин ҳолат ба худ хулосаи зарурӣ набароварда, дар ҳолатҳои зерин ҷинояти қаллобиро такроран содир намуд.
Чунончи, Носиров Ф.С. дар давоми соли 2023 аз мақсади шаҳрванд Ю. М. Р. ҷиҳати харидорӣ намудани манзили истиқоматӣ хабардор шуда, ба охирин пешниҳод кард, ки бар ивази маблағи 20000 сомонӣ метавонад аз маҳаллаи 1-ум ва бар ивази маблағи 25000 сомонӣ аз маҳаллаи 2-юми шаҳри Истиқлол манзилҳои истиқоматии давлатиро ба ному насабаш хусусӣ гардонида диҳад.
Ҳамин тариқ, Носиров Ф.С. бо роҳи фиреб ва истифодаи мақоми хизматиаш дар ду ҳолат аз шаҳрванд У.А.Г. тавассути ҳамсараш Ю.М.Р. маблағи 45000 сомониро гирифта, онро тасарруф намуда, ба манфиати шахсии худ сарф карда ба фоидаи онҳо ягон амалро иҷро накард.
Оиди ҳолатҳои мазкур дар асоси маводҳои ҷамъовардашуда нисбати Носиров Ф.С. бо моддаи 247 қисми 4 банди “б” КҶ Ҷумҳурии Тоҷикистон парвандаи ҷиноятӣ оғоз карда шуда, баъди ба итмом расидани тафтишоти пешакӣ парвандаи ҷиноятӣ бо тасдиқи фикри айбдоркунӣ ба суд ирсол карда шуд.
Чоп намудан
E-mail
.
Моҳи сентябри соли 2024 дар толори машваратии Мақомоти иҷроияи ҳокимияти давлатии шаҳри Турсунзода конфронси илмӣ-назариявӣ дар мавзӯи “Баланд бардоштани маърифати зиддикоррупсионии кормандони соҳаи маориф - омили муҳими муқовимат ба коррупсия” дар доираи тадбирҳои “Соли маърифати ҳуқуқӣ” баргузор гардид.
Дар чорабинӣ муовини раиси шаҳри Турсунзода, сардори шуъбаи минтақавии Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳру ноҳияҳои водии Ҳисор, намояндагони шуъбаи Вазорати корҳои дохилии Ҷумҳурии Тоҷикистон дар шаҳри Турсунзода, роҳбарият ва кормандони шуъбаи маориф, инчунин доираи васеи омӯзгорон ширкат варзиданд.
Чорабинии мазкур бо мақсади баланд бардоштани маърифати ҳуқуқии зиддикоррупсионии кормандони соҳаи маориф, пешгирӣ аз содиршавии кирдорҳои коррупсионӣ ва таъмини талаботи амиқи қонунгузории Ҷумҳурии Тоҷикистон дар самти муқовимат ба коррупсия доир гардида, дар рафти он ба иштирокчиён мазмуну муҳтавои қонунгузории самти муқовимат ба коррупсия ба иштирокчиён расонида шуд.
Аз ҷумла зикр карда шуд, ки Ҷумҳурии Тоҷикистон дар партави сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз рӯзҳои аввалини соҳибихтиёрии давлатӣ ба масъалаи муқовимат ба коррупсия таваҷҷӯҳи хоса зоҳир намуда, ҷиҳати мубориза бо ин падидаи номатлуб тамоми заминаҳои ҳуқуқӣ ва моддиро дар кишвар фароҳам овардааст.
Дар маҷмӯъ чорабинӣ дар фазои озод ва мубоҳисавӣ сурат гирифта, дар назар аст, ки натиҷаи он барои баланд бардоштани маърифати ҳуқуқии зиддикоррупсионии кормандони соҳаи маориф ва илми шаҳри Турсунзода ва муборизаи беамон бо падидаи номатлуби коррупсия заминаи мусоид фароҳам меоварад.
Чоп намудан
E-mail
.
Ҳайати расмии Агентии назорати давлатии молиявӣ ва мубориза бо коррупсияи Ҷумҳурии Тоҷикистон рӯзҳои аз 24 то 27 сентябри соли ҷорӣ дар ҷаласаи 5-уми пленарии Шабакаи ҷаҳонии амалиётӣ барои мақомоти бо коррупсияи муборизабаранда (GlobE Network), ки дар шаҳри Пекини Ҷумҳурии Мардуми Чин баргузор гашт, иштирок намуданд.
Маврид ба зикр аст, ки дар кори ҷаласа намояндагон ва шахсони воломақоми мақомоти зиддикоррупсионӣ ва дигар ниҳодҳои дахлдори давлатии аъзои Шабака зиёда аз 80 давлат ширкат варзида, вобаста ба паҳлуҳои мухталифи муқовимати байналмилалӣ ба зуҳуроти коррупсия маърӯза ва музокира анҷом доданд.
Ҷаласа дар сатҳи баланди байналмилалӣ баргузор гардида, дар назар аст, ки аз натиҷаи масъалаҳои баррасишуда қарорҳои дахлдор қабул карда шавад ва онҳо метавонанд дар ташаккули минбаъдаи ҳамкориҳо байни мақомоти зиддикоррупсионии кишварҳои ҷаҳон муосидат намоянд.
Дар маҷмӯъ, чорабинӣ дар фазои дустӣ, музокиравӣ ва эҳтироми якдигари сурат гирифта, умед аст, ки натиҷаҳои он барои боз ҳам тақвият бахшидани сиёсати Ҳукумати Ҷумҳурии Тоҷикистон дар самти муқовимат ба коррупсия ва ба роҳ мондани робита бо ниҳодҳои зиддикоррупсионии кишварҳои минтақа ва ҷаҳон заминаи мусоидро фароҳам оварад.
Маркази матбуоти Агентӣ.
Чоп намудан
E-mail
.
26 сентябри соли 2024 дар шаҳри Алмаатои Ҷумҳурии Қазоқистон ҷаласаи 23-уми Шӯрои ҳамоҳангсозии роҳбарони мақомоти тафтиши молиявии (КСОНР) давлатҳои аъзои Иттиҳоди Давлатҳои Мустақил баргузор гардид, ки дар он ҳайати расмии Агентии назорати давлатии молиявӣ ва мубориза бо коррупсияи Ҷумҳурии Тоҷикистон таҳти роҳбарии директори мақомот - Султонзода Сулаймон Саид иштирок намуданд.
Инчунин, дар ҷаласа намояндагон аз давлатҳои Озарбойҷон, Арманистон, Беларус, Қазоқистон, Ӯзбекистон, Федератсияи Россия ва Кумитаи иҷроияи Иттиҳоди Давлатҳои Мустақил ширкат варзида, фаъолияти Шўрои мазкурро дар самти таҳкими сулҳу субот ва амнияти иқтисодӣ дар сатҳи баланд арзёбӣ карданд.
Таъкид гардид, ки фаъолияти Шӯро мунтазам рушд намуда, он имкон медиҳад, ки содиршавии ҷиноятҳои иқтисодии трансмиллӣ, аз ҷумла ҷиноятҳои коррупсионӣ пешгирӣ карда шуда, нисбат ба онҳо чораҳои зарурии саривақтӣ андешида шавад.
Илова ба ин, иштирокчиён дар ҷаласа масъалаҳои мубрами мубориза бо ҷиноятҳои иқтисодӣ ва коррупсионӣ, ҷиноятҳои бо истифода аз дороиҳои рақамӣ содиршаванда, муқовимат ба маблағгузории терроризм ва ҷиноятҳои ба андоз алоқаманд, ки бо истифода аз интернет ва воситаҳои рақамии пардохт содир мешаванд, баррасӣ намуда, вобаста ба тарзу усулҳои ошкори ҷиноятҳо дар ин самт табодули афкор намуданд.
Дар охир, вобаста рӯзномаи ҷаласа қарорҳои дахлдор қабул гардида, бо назардошти вазъи кунунии ҷомеаи ҷаҳонӣ даъват ба амал оварда шуд, ки ҷиҳати боз ҳам пурзӯр намудани мубориза бо ҷинояткории трансмиллӣ ҳамкориҳо дар доираи Шӯро тақвият дода шаванд.
Маркази матбуоти Агентӣ.
Чоп намудан
E-mail
.
19 сентябри соли 2024 дар доираи ҷаласаи 9-уми Шӯрои байнидавлатии муқовимат ба коррупсияи давлатҳои аъзои Иттиҳоди Давлатҳои Мустаъқил аз ҷониби директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Султонзода Сулаймон Саид ва Прокурори генералии Федератсияи Россия Краснов Игор Викторовия «Созишнома оид ба ҳамкорӣ байни Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Прокуратураи генералии Федератсияи Россия дар самти муқовимат ба коррупсия» ба имзо расонида шуд.
Чорабинӣ дар шароити тантанавӣ сурат гирифта, дар рафти он роҳбарони ду ҷониб муҳимияти ҳамкории мутақобилан судмандро дар самти муқовимат ба коррупсия бисёр муҳим арзёбӣ намуданд.
Баимзорасонии Созишномаи мазкур бо назардошти эътироф намудани асосҳои соҳибихтиёрӣ, истиқлолияти миллӣ, баробарӣ ва манфиатҳои ҳарду давлати дӯсту бародар ба мақсад мувофиқ шуморида шуда, ҷонибҳо изҳори боварӣ намуданд, ки барқарорсозии ҳамкориҳои мутақобилаи судманд миёни мақомотҳои марбута дар оянда ба таҳкими муносибатҳои дӯстонаи ду мамлакат шароити мусоидат фароҳам оварда, барои тақвият бахшидани неруҳои муборизабарандаи зидди коррупсия таъсири мусбӣ мерасонад.
Маркази матбуоти Агентӣ.
Чоп намудан
E-mail
.
18-19 сентябри соли 2024 дар шаҳри Парижи Ҷумҳурии Фаронса ҷараёни иҷрои даври 5-уми мониторинги тавсияҳои Шабакаи Шабакаи зиддикоррупсионии Созмони Ҳамкории Иқтисодӣ ва Рушд дар доираи Нақшаи Истамбулии амалҳои мубориза бар зидди коррупсия барои давлатҳои Аврупои Шарқӣ ва Осиёи Марказӣ мавриди натиҷагирӣ ва баҳогузорӣ қарор дода шуд.
Дар рафти чорабинӣ гурӯҳи мониторингӣ, ки ҷараёни иҷрои тавсияҳои Шабакаро аз ҷониби Ҷумҳурии Тоҷкистон мавриди арзёбӣ қарор дода буданд, вобаста ба 9 самти баҳодиҳӣ, аз ҷумла сиёсати зиддикоррупсионӣ, бархӯрди манфиатҳо ва эъломиякунонии дороиҳо, ҳимояи хабаррасонҳо, покниҳодӣ дар тиҷорат, покниҳодӣ дар самти хариди давлатӣ, мустақилияти ҳокимияти судӣ, мустақиляти мақомоти прокуратура, ниҳодҳои махсусгардонидашудаи мубориза бо коррупсия, ҷавобгарӣ барои содир намудани ҷиноятҳои коррупсионӣ фикру ақидаҳои хешро иброз намуданд.
Тибқи барномаи кории чорабинӣ санаи 17 сентябри соли ҷорӣ ҳисоботи давлатҳои Қазоқистон, Қирғизистон ва Муғулистон баррасӣ ва шунида шуда, ҳайатҳои расмии ҷумҳуриҳои Тоҷикистон ва Ӯзбекистон ҳисоботҳои мониторингии худро санаи 18 сентябри соли 2024 ҳимоя намуданд.
Муовини якуми директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон ҳамчун роҳбари ҳайати расмӣ доир ба мавзуъ баромад карда, азму иродаи қотеонаи мақомоти Агентӣ ва дигар ниҳодҳои кишварро дар амалигардонии сиёсати байналмилалии зиддикоррупсионӣ ва муқовимат ба ин падидаи номатлуб баён дошта, тақвияти кӯшишҳои дастаҷамъона ва ҳамкориҳои густурдаро дар ин самт яке аз роҳҳои муассири ноил гардидан ба ин ҳадафҳои банақшагирифташуда арзёбӣ намуд.
Зимнан намояндагони Ҷумҳуриҳои Булғористон, Арманистон, Босня ва Герсоговина доир ба таҷрибаи Ҷумҳурии Тоҷикистон дар самти амалӣ намудани сиёсати давлатии зиддикоррупсионӣ, ба роҳ мондани хариди давлатии мол кор ва хизматрасонӣ, таҳкими фазои мусоиди сармоягузорӣ, инчунин, фаъолияти мақомоти бо коррупсия муборизабаранда ба ҳайати расмии кишвар саволҳои худро пешниҳод карда, доир ба он ҷавобҳои мушаххас ва қонеъкунанда гирифтанд.
Дар умум чорабинӣ дар фазои ҳусни тафоҳум ба анҷом расида, иштирокчиён изҳори боварӣ намуданд, ки таҷрибаи андухта барои густариши ҳамкориҳои судманд ҷиҳати ба роҳ мондани муқовимати дастаҷамъона ба коррупсия дар сатҳи минтақа ва ҷаҳон заминаи мусоидро фароҳам меоварад.
Маркази матбуоти Агентӣ.
Чоп намудан
E-mail
.
16-17 сентябри соли 2024 дар шаҳри Парижи Ҷумҳурии Фаронса мулоқоти ҳайати расмии Ҷумҳурии Тоҷикистон таҳти роҳбарии муовини якуми директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон, намояндагони Агентии хариди давлатии мол, кор ва хизматрасонии назди Ҳукумати Ҷумҳурии Тоҷикистон, КВД “Тоҷикаэронавигатсия” ва дигар масъулини мақомоти Агентӣ бо гурӯҳи мониторингии Шабакаи зиддикоррупсионии Созмони Ҳамкории Иқтисодӣ ва Рушд (СҲИР) доир гардид.
Зимни мулоқоти корӣ атрофи саволҳои иловагии коршиносон ва дигар масоили ба тавофуқнаомада доир ба 9 самти баҳодиҳии даври 5-уми мониторинги тавсияҳои Нақшаи Истамбулии амалҳои мубориза бар зидди коррупсия барои давлатҳои Аврупои Шарқӣ ва Осиёи Марказии Шабакаи мазкур мубоҳисаи ҷонибҳо сурат гирифта, боиси хушнудист, ки дар натиҷаи мубоҳисаҳои тӯлонӣ ваҷҳҳои пешниҳоднамудаи ҳайати расмии кишвар пазируфта шуд.
Бо натиҷаи чорабинӣ як қатор саволҳои пешниҳодгардида ҳалли худро ёфтанд, ки он баҳри ба даст овардани арзёбии муносиб вобаста ба натиҷаи ниҳоии ҳисоботи кишвар оид ба даври 5-уми мониторинги тавсияҳои Шабакаи зиддикоррупсионии СҲИР таъсири мусбӣ расонид.
Чорабинӣ дар фазои ҳамдигарфаҳмӣ ва муҳити дӯстона ҷараён гирифта, барои меҳмоннавозии самимона ҳангоми ташрифи гурӯҳи мониторингӣ, ҳамкории густурда, маҳорати касбӣ, муаррифии арзандаи сиёсати зиддикоррупсионии Ҷумҳурии Тоҷикистон ба ҳайати расмии кишвар аз ҷониби Котиботи шабака ва коршиносони байналмилалӣ баҳои баланд дода шуд.
Дар фарҷом ҷонибҳо изҳори боварӣ намуданд, ки дар доираи ҳамкориҳои мутақобилаи судманд ва ҳамоҳангии муттаасил дар ояндаи наздик иҷрои тавсияҳои Шабака таъмин гардида, ба ин васила мавқеи Ҷумҳурии Тоҷикистон дар раддабандиҳои байналмилалӣ баланд бардошта мешавад.
Маркази матбуоти Агентӣ.
Чоп намудан
E-mail
