08 июля 2023 .
6 июл Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон дар шаҳри Хуҷанд Корхонаи коркарди қоғаз ва истеҳсоли маҳсулоти палиграфии Ҷамъияти дорои масъулияти маҳдуди “Папирус”-ро ба истифода дода, бо имконияти истеҳсолии он шинос шуданд.
Тавре ба Сарвари давлат иттилоъ дода шуд, корхонаи истеҳсолӣ асосан ба коркарди қоғаз ва истеҳсоли дафтарҳои мактабӣ, фаннӣ, корӣ ва албом машғул мебошад.
Корхона бо хатти муосири истеҳсолӣ, ки сифати маҳсулотро ҳамаҷониба таъмин менамояд ва аз рӯи стандартҳои байналмилалӣ фаъолият мекунад, таъмин гардидааст.
Иқтидори шабонарӯзии корхона 150-200 ҳазор дафтарҳои гуногун ва албомро ташкил медиҳад, ки дар як моҳ ба 4,5 миллион дона баробар мешавад. Барои истеҳсоли ин миқдор маҳсулот 140-150 тонна ашёи хом коркард мешавад.
Маҳсулоти истеҳсолкардаи корхона ивазкунандаи воридот ва ба содирот нигаронидашуда ба ҳисоб меравад. Тақрибан 98 дарсади маҳсулоти истеҳсолшуда барои содирот пешбинӣ шудааст.
Корхонаи нави истеҳсолии Ҷамъияти дорои масъулияти маҳдуди “Папирус” аз ҷониби соҳибкори маҳаллӣ дар доираи дастгириҳои Ҳукумати Ҷумҳурии Тоҷикистон бунёд ёфта, барои ноил шудан ба ҳадафи чоруми стратегӣ – саноатикунонии босуръати кишвар заминаи мусоид маҳсуб меёбад.
Зимни шиносоӣ Сарвари давлат ба маҳсулоти истеҳсолшуда ва фаъолияти коргарон баҳои баланд дода, намояндагони бахши хусусиро барои истифодаи бештар аз имтиёзҳои пешниҳодкардаи Ҳукумати мамлакат ва дар ҳамин замина афзун гардонидани истеҳсоли маҳсулот ҳидоят карданд.
Ифтитоҳи чунин корхонаву коргоҳҳо барои тавлиди маҳсулоти рақобатпазири ивазкунандаи воридот боис гардида, дар оянда метавонанд, ки иқтидори содиротии мамлакатро боз ҳам болотар баранд. Зеро талабот ба чунин маҳсулоти хушсифат на танҳо дар дохил, балки дар хориҷ ҳам хеле зиёд аст.
Сохтмони иншооти мазкур соли 2022 оғоз гардида, бо дарназардошти талаботи замони муосир дар масоҳати наздик ба якуним гектар замин бунёд ёфта, ҳамчунин дорои дигар иншооти ёрирасон мебошад.
Рушди соҳаи саноат, баланд гардидани иқтидори истеҳсолӣ, таъмин намудани сокинони мамлакат бо ҷойҳои нави корӣ ва дар ин замина кам намудани сатҳи камбизотӣ аз масъалаҳои асосӣ ба шумор рафта, пайваста зери таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон қарор дорад.
Ҳамин аст, ки сол то сол дар ҷумҳурӣ шумораи корхонаҳои саноатӣ зиёд гардида, ҳаҷми истеҳсоли маҳсулоти саноатӣ ба маротиб афзоиш меёбад.
08 июля 2023 .
6 июл Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шафати варзишгоҳи 20 - солагии Истиқлоли давлатии Ҷумҳурии Тоҷикистон дар шаҳри Хуҷанд Маркази савдо ва фароғатии “Хонаи ман”-ро ба истифода доданд.
Иншооти хизматрасонӣ аз 3 ошёна иборат буда, дар масоҳати қариб 6 ҳазор метри мураббаъ бо тарҳи муосир ва ҷавобгӯ ба стандарти меъмории муосир сохта шудааст.
Дар Маркази савдою хизматрасонии “Хонаи ман” дар маҷмуъ 70 нафар бо ҷойи кор таъмин шудааст ва оянда бо васеъ кардани доираи фаъолият шумораи кормандон ба 100 нафар расонида мешавад.
Корҳои сохтмонӣ дар иншооти хизматрасонӣ соли 2019 оғоз гардида буд. Дар зарфи ду сол 90 нафар мутахассиси соҳибтаҷриба тавонистанд иншоотро бо тарҳи зебо, мутобиқ ба талаботи замон ва ҷавобгӯ ба меъёрҳои байналмилалӣ бунёд созанд.
Тавассути бунёди ҳамин гуна маркази хизматрасонии хуштарҳу замонавӣ ва дар асоси таҷрибаи ғанӣ ба роҳ мондани фаъолият хизматрасонӣ ба талаботи муосири сатҳи ҷаҳонӣ мутобиқ гардонида мешавад.
Пешвои муаззами миллат муҳтарам Эмомалӣ Раҳмон бо истифода аз шароити муосир таваҷҷуҳи кормандонро ба хизматрасонии сатҳи баланду босифат ҷалб карданд.
Дар ошёнаи якуми бино фаъолияти аввалин намояндагии Ҷамъияти дорои масъулияти маҳдуди “Ёвар” дар вилояти Суғд ба роҳ монда шуд.
Дар ин ҷо ҳамагон метавонанд аз хизматрасонии маркази калони савдо, дорухона ва нуқтаи фурӯши таҷҳизоти электронӣ истифода намоянд.
Бо дарназардошти талаботи замони муосир фаъолият бо афзалият ба иқтисодиёти рақамӣ, асосан ғайринақдӣ ба роҳ монда хоҳад шуд.
Бо истифода аз таҷҳизоту таҷрибаи нав, аз ҷумла шароити худхизматрасонӣ, яхдонҳо, кондитсионерҳо, дастгоҳҳои таъминкунандаи бехатарӣ аз сӯхтор ва камераҳои назоратӣ пурра имконияти марказ ба талаботи байналмилалӣ мутобиқ гардонида шудааст.
Ҳамарӯза ба таври шабонарӯзи мизоҷон метавонанд маҳсулоти босифатро дастрас намоянд, ки зиёда аз 60 фоизи он истеҳсоли ватанӣ мебошад.
Дар ошёнаи дуюм мағозаи фирмавии Юск (Jysk) ба фаъолият оғоз кард, ки дар он фурӯши мебал ва таҷҳизот барои хона ба роҳ монда шудааст. Мизоҷон метавонанд муроҷиат карда, аз хизматрасонии сатҳи баланди мутобиқ ба стандартҳои байналмилалӣ баҳравар шаванд.
Дар ошёнаи сеюми иншоот фаъолияти маркази фароғатӣ барои кӯдакон ба роҳ монда шудааст. Барои фароғати наврасон таҷҳизот аз давлатҳои пешрафтаи дунё дастрас карда шудааст.
Сарвари давлат муҳтарам Эмомалӣ Раҳмон татбиқи нақшаи чорабиниҳои ҷашни 35-солагии Истиқлоли давлатии Ҷумҳурии Тоҷикистонро барои таъмини зебогии шаҳру ноҳияҳо, фаро гирифтани сокинони маҳаллӣ ба ҷойи кори доимӣ ва пешрафти иқтисодиёт муҳим арзёбӣ карданд.
Равшаннамоӣ ва зебогии атрофи иншоот мутобиқ ба талаботи стандарти лоиҳавӣ таъмин карда шуда, гулу буттаҳои ороишӣ шинонида шудааст.
Дар ҳамин рӯз Президенти Ҷумҳурии Тоҷикистон муҳтарам Эмомалӣ Раҳмон ба 100 нафар ятим туҳфаҳо тақдим карда, бо онҳо суҳбати самимӣ оростанд.
Дар солҳои Истиқлоли давлатӣ дастгирии ятимону бепарасторон зери таваҷҷуҳи доимии Ҳукумати мамлакат қарор дорад ва ба онҳо пайваста кӯмакҳои моддӣ расонида мешавад. Ҳамзамон имрӯз ятимон барои таҳсилу фаъолият аз имтиёзҳо баҳравар ҳастанд.
Бунёду навсозии иншооти замонавии соҳа ва ба талаботи замон мутобиқ гардонидани шароити таҳсилу зисти ятимон натиҷаи дастгириҳои доимии Ҳукумати Ҷумҳурии Тоҷикистон мебошад.
Пешвои муаззами миллат муҳтарам Эмомалӣ Раҳмон таъкид карданд, ки дастгирии ятимону бепарасторон зери ғамхории доимии Ҳукумати Ҷумҳурии Тоҷикистон қарор дорад ва давлат намегузорад, ки онҳо эҳсоси танҳоӣ кунанд.
Дастгириву таваҷҷуҳи доимӣ ва фароҳам овардани шароит барои омӯзиш имрӯз ҳавасмандии ин гурӯҳи наврасонро барои таҳсили намунавӣ ва оянда хизмат кардан ба нафъи давлату миллат афзун гардонидааст.
08 июля 2023 .
6 июл дар шаҳри Бӯстони вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Корхонаи истеҳсоли қубурҳои полиэтилении Ҷамъияти дорои масъулияти маҳдуди “Мироб”-ро мавриди баҳрабардорӣ қарор доданд.
Корхонаи истеҳсоли қубурҳои полиэтиленӣ бо 15 ҷойи доимии корӣ ба истиқболи 35-солагии Истиқлоли давлатӣ, дар доираи “Солҳои рушди саноат” - 2022-2026 дар минтақаи саноатии шаҳри Бӯстон аз ҷониби оилаи Шарифовҳо бунёд гардидааст.
Дар корхона истеҳсоли 16 намуд қубури полиэтилении қутрашон аз 15 то 315 миллиметра ба роҳ монда шудааст. Дарозии қубурҳо вобаста ба қутрашон аз 6 то 100 метр истеҳсол мегардад.
Иқтидори истеҳсолии корхонаи саноатӣ дар як шабонарӯз аз 400 то 500 метр ва дар як сол аз 50 то 60 ҳазор метр қубурҳои полиэтилении босифат мебошад.
Аснои шиносоӣ бо ҷараёни истеҳсолот дар корхонаи навбунёд Пешвои миллат муҳтарам Эмомалӣ Раҳмон ба иқдоми созандаи соҳибкори маҳаллӣ баҳои баланд дода, таъсиси корхонаи саноатиро дар самти истеҳсоли маҳсулоти ивазкунандаи воридот ва ба содирот нигаронидашуда намуна арзёбӣ карданд.
Ба корхона ду хати муосири технологӣ аз Ҷумҳурии Мардумии Чин дастрас гардида, барои истеҳсоли қубурҳо дар як моҳ то 10 тонна ашёи хом - полиэтилени тамғаи ПЭ 100 то марҳилаи ниҳоӣ коркард карда мешавад. Ашёи хом асосан аз Федератсияи Русия, Ҷумҳурии Исломии Эрон ва Ҷумҳурии Узбекистон ворид мегардад.
Аз руи маълумоти мутахассисон қубурҳои полиэтилении истеҳсоли корхонаи нав аз лиҳози намуд ва сифат ба талаботи байналмилалӣ ҷавобгӯ буда, дар бозорҳо рақобатпазир мебошад.
Имрӯзҳо қубурҳои полиэтиленӣ дар соҳаи обу корез, низоми таъминоти газ, барои муҳофизати кабел ва ноқилҳои барқӣ ва обёрӣ дар соҳаи кишоварзӣ васеъ истифода мегардад. Дар сурати зиёд шудани фармоиш аз ҷониби аҳолӣ, ширкатҳои сохтмонӣ ва талаботи бозор ба қубурҳои полиэтиленӣ ҳаҷми истеҳсолот афзоиш дода шуда, теъдоди кормандон низ зиёд мегардад.
Дар саҳни корхонаи истеҳсоли қубурҳои полиэтилении Ҷамъияти дорои масъулияти маҳдуди “Мироб” намунаҳои маҳсулоти истеҳсолшуда муаррифӣ гардид.
Иттилоъ дода шуд, ки айни замон дар шаҳри Бӯстон 51 корхонаи саноатӣ мавҷуд буда, дар онҳо 20 намуд маҳсулот, аз ҷумла молҳои ивазкунандаи воридот истеҳсол карда мешаванд. Дар 5 моҳи соли ҷорӣ дар шаҳри Бӯстон ба маблағи 255 миллион сомонӣ маҳсулоти саноатӣ истеҳсол карда шудааст, ки нисбат ба ҳамин давраи соли гузашта 11,2 миллион сомонӣ зиёд буда, ба 105 дар сад баробар аст.
Бояд гуфт, ки дар раванди татбиқи ҳадафи чоруми миллӣ - саноатикунонии босуръати кишвар сармоягузорону соҳибкорони ватанӣ саҳми арзишманд мегузоранд. Ин тадбир дар афзоиши истеҳсолоти худӣ ва ҳам дар таъмини сокинон бо ҷои кору маоши хуб заминаи воқеӣ мегузорад.
08 июля 2023 .
5 июл Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ ба ноҳияи Шаҳристони вилояти Суғд парваришгоҳи нигоҳдории ҳайвоноти нодирро ба истифода доданд.
Масоҳати умумии парваришгоҳ 200 гектар буда, ин мавзеи ноҳияи Шаҳристон барои парвариши ҳайвоноти нодир иқлими мусоид дорад.
Ба Пешвои миллат муҳтарам Эмомалӣ Раҳмон иттилоъ дода шуд, ки дар парваришгоҳи навтаъсис асосан ду намуд ҳайвони нодир, оҳуи аврупоии лан ва гӯсфанди шохдори муфлонӣ парвариш ва нигоҳубин карда мешавад. Парваришгоҳи мазкур аз ҷониби Ҷамъияти дорои масъулияти маҳдуди “Газнафт” ташкил гардидааст.
Дар ҳамин ҷо Президенти мамлакат ҳайвоноти нодирро ба табиат сар доданд.
Парваришгоҳ дар мавзеи зебоманзар ва хушбоду ҳавои Хуррамдараи ноҳияи Шаҳристон ташкил гардида, дарахтони зиёд ва гулу гиёҳҳои ҳархелаи худрӯй дорад. Дар ин мавзеъ асосан арчаи зарафшонӣ хуб нашъунамо ёфта, муҳити атрофро сабзу хуррам нигоҳ медорад.
Дар парваришгоҳ барои нигоҳубин ва марҳила ба марҳила зиёд намудани саршумори ҳайвоноти нодир шароит ва имкониятҳои васеъ мавҷуд буда, дар ин самт зоти оҳуи аврупоӣ аз хориҷи кишвар ворид карда шудааст.
Тибқи иттилои масъулон моҳи декабри соли 2022 аз Ҷумҳурии Беларус 30 сар оҳуи зоти лан ворид гардид. Намудҳои оҳу нахуст ба иқлими Тоҷикистон мутобиқ гардонда шуда, аз онҳо насли нав гирифта мешавад.
Дар марҳилаи аввал 15 гектар ҳудуди парваришгоҳ бо симтур маҳкам карда шудааст. Ин тадбир имконият медиҳад, ки ҳайвоноти нодир ҳифз карда шаванд ва саршумори он сол ба сол зиёд гардад.
Иқлим ва боду ҳавои мусоиди Тоҷикистон, бахусус ноҳияи Шаҳристон имконият медиҳад, ки дар натиҷаи дуруст парвариш ва нигоҳубин кардани ин намуди оҳу насли он низ ҳамасола ба маротиб зиёд карда шавад. Дар соли якум 8 сар оҳу тавлид шудааст. Ҳоло шумораи намуди оҳуи лани аврупоӣ ба 38 сар расидааст ва наслгирӣ аз он идома дорад.
Дар асоси гуфтаи олимони соҳа насли наринаи намуди оҳуи аврупоии лан то 80 килограм ва модинаи он бошад, то 60 килограм вазн мегиранд. Ба роҳ мондани парвариш ва нигоҳубини намуди оҳуи аврупоии лан барои рушд бахшидани соҳаи сайёҳӣ, хусусан сайёҳии экологӣ замина гузошта, дар оянда омили муҳими ҷалби сайёҳони дохилию хориҷӣ ба Тоҷикистон мегардад.
Дар мамнуъгоҳ дар баробари парвариши оҳуи аврупоии лан, ки бори аввал ба Тоҷикистон оварда шудааст, инчунин гӯсфанди шохдори муфлон низ парвариш меёбад.
Президенти мамлакат муҳтарам Эмомалӣ Раҳмон зимни боздид аз шароити парваришгоҳ, ки дар мавзеи хушбоду ҳавои ноҳияи Шаҳристон таъсис дода шудааст, бо масъулони соҳа суҳбати самимӣ анҷом дода, ҷиҳати дар оянда зиёд намуди саршумори оҳуи навъи аврупоии лан ва гӯсфанди шохдори муфлон, дуруст парвариш кардан ва ба иқлими Тоҷикистон мутобиқ намудани ин намуди оҳуҳо дастуру супоришҳои мушаххас доданд.
Мавҷуд будани чунин имконияти табиӣ дар беҳтар намудани гуногунии биологӣ ва ба ин васила бештар намудани навъҳои ҳайвоноти нодир аҳамияти калон дорад. Дар шароит ва мевқеи ҷуғрофии Тоҷикистон таъсиси парваришгоҳҳо ва мамнуъгоҳҳо афзалияти бештар дошта, ба афзоиш ёфтани саршумори ҳайвоноти нодир мусоидат менамояд, ки ин аз ҳадафҳои ояндадори ҳукумати мамлакат ба ҳисоб меравад.
08 июля 2023 .
5 июл дар доираи сафари корӣ дар вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Шаҳристон ташриф оварданд.
Сарвари давлат муҳтарам Эмомалӣ Раҳмон нахуст дар мавзеи Хуррамдараи ноҳияи Шаҳристон иншооти нави обрасониро мавриди истифода қарор дода, аз нашъунамои картошка дар Хоҷагии деҳқонии “Нур” шинос шуданд.
Набудани оби полезӣ дар баъзе аз қисматҳои ин мавзеъ мушкилоти асосӣ ба шумор мерафт ва бо ҳамин сабаб кишоварзон наметавонистанд ҳосили фаровон ба даст оваранд.
Дар доираи таваҷҷуҳ ба рушди соҳаи кишоварзӣ ва дастгирию ҳидоятҳои Пешвои муаззами миллат муҳтарам Эмомалӣ Раҳмон ин мушкилӣ ба зудӣ роҳи ҳалли худро пайдо кард ва тавассути бунёди иншооти нави обрасонӣ ва насби насосҳои махсуси обкашӣ 15 гектар замини корами мавзеи Хуррамдара обёрӣ шуд.
Оби полезӣ ба ин мавзеъ аз масофаи қариб як километр бо қубури қутраш 110 миллиметра оварда шуда, барои захира ва таъмини доимии он ҳавзи махсус бунёд шудааст.
Президенти мамлакат муҳтарам Эмомалӣ Раҳмон зимни боздид аз Хоҷагии деҳқонии “Нур” ва суҳбати самимӣ бо деҳқонону масъулони соҳа таъкид намуданд, ки рушди соҳаи кишоварзӣ ва таъмини фаровонии маҳсулоти тару тозаи ватанӣ омили асосии боз ҳам беҳтар гардидани сатҳи зиндагии аҳолӣ мебошад. Дар ин замина кишоварзону деҳқонон бояд аз боду ҳаво ва имкониятҳои мавҷуда ба таври васеъ истифода намоянд то сол аз сол ҳосилнокии маҳсулот дар заминҳои корам афзоиш ёбад.
Дар маҷмуъ бо кашидани оби полезӣ дар ин мавзеъ аввалин маротиба дар майдони 8 гектар замин тухмии 3 навъи картошкаи маҳаллӣ кишт карда шуд, ки мувофиқи хулосаи олимони соҳаи кишоварзӣ имруз нашъунамои он хуб мебошад. Ҳосилнокии ин намуди картошка ба ҳисоби миёна аз ҳар як гектар аз 280 то 390 сентнер мебошад.
Имсол хоҷагидорони ноҳия нақша доранд, ки аз ҳисоби заминҳои картошка зиёда аз 50 ҳазор тонна маҳсулот ҳосил ба даст оранд.
Дар ҳамин ҷо ба Пешвои миллат муҳтарам Эмомалӣ Раҳмон имкониятҳои истеҳсолӣ ва дастовардҳои аҳли заҳмати ноҳия муаррифӣ гардид.
Имсол кишоварзони ноҳияи Шаҳристон дар заминаи истифодаи самараноки замин, нигоҳубини хуби боғу токзор ва васеъ намудани майдони кишти ғалладонагӣ ва сабзавот ба дастовардҳои назаррас ноил гардиданд.
Тавре таъкид гардид, боду ҳаво ва табиати нотакрори ноҳияи Шаҳристон барои рушди соҳаи занбуриасалпарварӣ, боғдорӣ, ҳифз ва коркарди гиёҳҳои шифобахши худруй, рушди соҳаи чорводорӣ ва дигар бахшҳои муҳими соҳаи кишоварзӣ мусоид буда, хоҷагидорон барои расидан ба ҳадафҳои рушд ва афзоши ҳаҷми истеҳсоли маҳсулоти кишоварзӣ аз имкониятҳои мавҷуда самаранок истифода мебаранд.
Соли гузашта ҳоҷагидорони асалпарвари ноҳия ба миқдорӣ 32 тонна асал истеҳсол намуданд ва имсол дар заминаи ташкили хоҷагиҳои нав истеҳсоли асал нисбат ба соли гузашта боз ҳам афзоиш меёбад.
Дар ин ҷо асосан маҳсулоти нонӣ, асал, меваю сабзавот, шир ва маҳсулоти ширӣ, беш аз 20 намуд гиёҳҳои шифобахш ва маҳсулоти аз онҳо омодашуда, инчунин чорвои хурду калон ба намоиш гузошта шуд.
Дар ноҳияи Шаҳристон тадриҷан ба рушди ҳамаи бахшҳои соҳаи кишоварзӣ таваҷҷуҳи махсус зоҳир карда мешавад. Натиҷа ҳамин аст, ки хоҷагидорон ҳосили баланди меваю сабзавотро ба даст оварда, дар баробари таъмини талаботи дохилӣ ҳамзамон ба хориҷи мамлакат содирот менамоянд.
Имсол дар маҷмуъ дар ҳудуди ноҳия 52 гектар боғи нав бунёд карда шуд ва ин раванд дар солҳои оянда низ идома дода мешавад.
Дар ноҳияи Шаҳристон бо дастгирии Ҳукумати мамлакат бо мақсади таъмини талаботи аҳолӣ бо гушту шир саршумори чорво афзоиш дода мешавад. Тибқи маълумот ҳоло дар ноҳия 853 сар асп, наздики 23 ҳазор чорвои калон, 79 ҳазор чорвои майда ва 35 сар қӯтос нигоҳубин мешавад.
Дар шароити ноҳияи Шаҳристон, ки дорои боду ҳавои мусоиду обҳои мусаффо мебошад зиёд намудани саршумори қӯтос ва афзоиши зотҳои нави он ба манфиат буда, солҳои охир дар ин самт тадбирҳои зарурӣ амалӣ карда мешавад.
Пешвои миллат муҳтарам Эмомалӣ Раҳмон барои дар оянда ноил гардидан ба ҳадафҳои рушд, аз ҷумла таъмини амнияти озуқавории мамлакат ва боз ҳам рушд додани соҳаи кишоварзӣ ба масъулон дастур доданд, ки ҷиҳати афзоиши ҳаҷми истеҳсоли маҳсулот аз имкониятҳои мавҷуда васеъ истифода намоянд.
08 июля 2023 .
5 июл дар доираи сафари корӣ дар вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баъди ифтитоҳи Корхонаи металлургӣ дар Ҷамъияти дорои масъулияти маҳдуди Корхонаи муштараки “Зарафшон”-и шаҳри Панҷакент бо 100 нафар ятими кулл аз шаҳру ноҳияҳои Панҷакент, Бӯстон, Айнӣ, Шаҳристон, Кӯҳистони Мастчоҳ ва Зафаробод мулоқот карда, ба онҳо туҳфаҳо тақдим намуданд.
Мавриди зикри хос аст, ки чун анъана Сарвари ятимпарвари тоҷикон муҳтарам Эмомалӣ Раҳмон зимни ҳар як сафари кориашон аз ҳолу аҳволи ятимон бохабар гардида, нисбати ин қишри ҷомеа ғамхорӣ зоҳир менамоянд.
Дар мулоқоти имрӯза ба ятимон дар доираи сиёсати иҷтимоии Ҳукумати Ҷумҳурии Тоҷикистон ва идомаи ғамхориҳо нисбат ба ятимон аз ҷониби Пешвои муаззами миллат муҳтарам Эмомалӣ Раҳмон баробари оростани дастархони пурнозу неъмат ба наврасону ҷавонон, ки бо амри тақдир аз навозиши волидайн бенасиб мондаанд, маҷмӯи сару либос, кумаки молиявӣ ва шириниҳо тақдим карда шуд. Ин ҳолат хушҳолию фараҳи кӯдаконро афзун намуд.
Ятимон бо шодию нишот аз дасти Роҳбари инсондӯст тӯҳфаҳои арзишманд гирифтанд.
Ҳангоми тақдими тӯҳфаҳо гуфта шуд, ки ғамхорӣ нисбат ба ятимону бепарасторон ва фарзандони оилаҳои камбизоат дар сиёсати иҷтимоии Ҳукумати Ҷумҳурии Тоҷикистон ҷойгоҳи махсус дошта, барои беҳтар намудани шароити таҳсил ва зиндагии онҳо пайваста тадбирҳои зарурӣ ва самарабахш андешида мешаванд.
Дар замони соҳибистиқлолӣ дар баробари дигар муассисаҳои таълимӣ, шароити таҳсил ва будубоши тарбиятгирандагон дар мактаб-интернатҳои ҷумҳуриявӣ барои кӯдакони ятим бо дастгириҳои пайвастаи Пешвои миллат беҳтару хубтар карда мешавад. Ҷавонону наврасони ятим худро ҳаргиз бесаробон ҳис накарда, бо шукргузорӣ аз фазои сулҳу осоиши мамлакат, илму ҳунар омӯхта, дар шукуфоии аз ин ҳам бештари Тоҷикистони соҳибистиқлол саҳми босазо мегузоранд.
Ятимони кул аз он изҳори хушҳолӣ карданд, ки дар як кишвари ободу зебо зиндагӣ карда, дониш меомӯзанд ва ҳамеша таҳти ғамхорию дастгирии Пешвои маҳбуби миллат қарор доранд.
Президенти мамлакат муҳтарам Эмомалӣ Раҳмон бо наврасону ҷавонони ятими шаҳру ноҳияҳои Панҷакент, Бӯстон, Айнӣ, Шаҳристон, Кӯҳистони Мастчоҳ ва Зафарободи вилояти Суғд суҳбати самимӣ ороста, онҳоро барои таҳсили хубу аъло, омӯхтани касбу ҳунар, забонҳои хориҷӣ ва кор бо технологияи муосир ҳидоят намуданд.
Зимни суханронӣ Сарвари давлат муҳтарам Эмомалӣ Раҳмон таъкид намуданд, ки Ҳукумати мамлакат ҳамеша ба қишрҳои ниёзманди ҷомеа, ба хусус ятимон таваҷҷуҳи ҳамаҷониба равона месозад. Давлату Ҳукумати Тоҷикистон сарпарастии ятимонро ба души худ гирифтааст ва то ба ҳаёти мустақилона қадам ниҳодани онҳо барои таълиму тарбия ва ба камол расиданашон тамоми шароитҳои заруриро муҳайё месозад.
Дар ҷавоб ба ҳама ғамхориҳои давлату ҳукумат наврасону ҷавононро зарур аст, ки илм омӯзанд, донишҳои замони муосирро аз худ намуда, дар оянда ҳамчун фарзанди содиқи Ватан ба халқу давлат хизмати шоиста намоянд.
5 июл дар шаҳри Панҷакент Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баъд аз ифтитоҳи корхонаи металлургии мисгудозӣ дар ҶДММ Корхонаи муштараки “Зарафшон” ва мулоқот бо ятимон дар саҳни ҳавлии корхона ҷиҳати мусоидат ба рушди соҳаи тандурустӣ ва беҳтар кардани хизматрасонии тиббӣ ба аҳолӣ ба сокинони шаҳри Панҷакент 4 адад нақлиёти муҷаҳҳази ёрии таъҷилии тиббӣ ва дастгоҳу таҷҳизоти муосири ташхисиро тақдим намуданд.
Нақлиёти соҳавӣ дорои шароити зарурӣ барои расонидани кумаки аввалияи тиббӣ ва интиқоли саривақтии беморон буда, чунин туҳфаи Пешвои муаззами миллат сатҳу сифати хизматрасониро ба сокинон боз ҳам баландтар хоҳад бардошт.
Ҳамчунин, ба бахши тандурусти шаҳри Панҷакент таҷҳизоти муосири тиббӣ, ки барои ташхиси беморон пешбинӣ гардидааст, аз қабили дастгоҳи рақамии рентгенӣ, таҷҳизоти ташхиси ултрасадоӣ, дастгоҳи ташхисии узвҳои нафас ва дигар лавозимоти зарурии тиббӣ тақдим карда шуд.
Сокинону кормандони соҳаи тандурустии шаҳри Панҷакент ба Пешвои миллат муҳтарам Эмомалӣ Раҳмон барои туҳфаҳои арзишманд ва ғамхории ҳамешагӣ изҳори сипос намуданд.
08 июля 2023 .
5 июл дар идомаи сафари корӣ дар вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳри Панҷакент ташриф оварданд.
Нахуст Президенти Ҷумҳурии Тоҷикистон муҳтарам Эмомалӣ Раҳмон бо бардоштани парда аз рӯи лавҳаи рамзӣ ба фаъолияти Корхонаи металлургии мисгудозӣ, пойгоҳи кислароди адсербтсионӣ, коргоҳи обтозакунию коркарди дубораи партов, полоишгоҳи рақами 3 дар Ҷамъияти дорои масъулияти маҳдуди Корхонаи муштараки “Зарафшон” оғоз бахшиданд.
Дар дастгоҳи марказии идоракунии корхонаи нав Пешвои муаззами миллат бо пахши тугма дастгоҳҳои пуриқтидори истеҳсолиро ба кор дароварданд ва ҳамин тавр Корхонаи металлургии мисгудозӣ ба истеҳсоли аввалин маҳсулоти худ шуруъ намуд.
Коргоҳи мазкур, ки ба истеҳсоли миси стандарти катодӣ машғул аст, иқтидори коркарди 165 ҳазор тонна консентрати дорои мис ва тиллоро дар як сол дошта, маҳсулоти ниҳоии аълосифатро аз он истеҳсол менамояд.
Иттилоъ дода шуд, ки аз ин миқдор консентрати коркардшуда дар навбати аввал 4,5 ҳазор тонна миси катодӣ, ҳамчунин ба миқдори муайян тилло ва нуқра истеҳсол карда мешавад.
Бояд қайд кард, ки то ба имрӯз хокаи консентрати дорои мис ҳамчун ашёи хом ба дигар давлатҳо барои коркарду истеҳсоли маҳсулоти ниҳоӣ содирот карда мешуд.
Корхона дар доираи дастуру супоришҳои Сарвари давлат муҳтарам Эмомалӣ Раҳмон ба хотири роҳандозии коркарди пурраву истеҳсоли маҳсулоти ниҳоӣ аз бойгариҳои табиии Тоҷикистон бунёд гардида, дар оянда миси катодии истеҳсолгардида чун маҳсулоти ивазкунандаи воридот ва ба содирот нигаронидашуда пешниҳоди харидорон карда мешавад.
Корхонаи мисгудозии ширкати муштараки “Зарафшон” бо муосиртарин технологияи ҷаҳонӣ бунёд ёфта, хаттҳои истеҳсолии он дар минтақа назир надоранд ва тибқи баҳогузории байналмилалӣ ба талаботи “Иқтисоди сабз” мутобиқ мебошад. Бартарияти дигари ин технология дар он арзёбӣ мегардад, ки дар як коргоҳ якбора мис ва тилло ҷудо карда мешавад. Ин таҷриба дар бахши металлургияи ҷаҳонӣ аввалин бор амалӣ гардид ва ин равад аз лиҳози экологӣ ҳам бартариятҳои зиёд дорад. Ҳамчунин ҳангоми коркард хокаи дорои мис, тилло ва нуқра дар ҳарорати то ба 220 дараҷа гармӣ тариқи автоклавӣ бо оксигени фишурда тафсонида мешавад, ки ба ин васила моддаҳои ба муҳити зист зиёновар аз ҷумла МИШ-1 (марги муш) ва сера ба таври табиӣ пурра безарар мегардад. Ин технология нахустин маротиба дар Тоҷикистон мавриди истифода қарор гирифт.
Иттилоъ дода шуд, ки корхонаи азими саноатӣ аз 9 сех, аз ҷумла сехҳои коркарди селлюлоза, истеҳсоли мис, шираи оҳактайёркунӣ, сехи туршкунии пешакӣ, коргоҳҳои бо оксиген дар зери фишор ишқоркунонӣ, коргоҳи электролизи мис, дегхонаи гармидиҳӣ, пойгоҳ барои гардиши об, стансияи компрессории ҳаво ва оби соф иборат мебошад. Дар ин баробар дар назди корхона бо назардошти технологияи муосир Коргоҳи алоҳидаи рейтсиклингии партовҳои сианитдор ва ё коркарди такрорӣ бунёд гардидааст, ки пасмонда ва ё партови ашёи хоми коркардшуда дар ин иншоот аз сари нав барои истеҳсоли маҳсулоти ниҳоӣ истифода бурда мешавад ва ин имконият медиҳад, ки ашёи хом ҳамаҷониба ва ба пуррагӣ мавриди коркард қарор дода шавад. Бояд гуфт, ки партовҳои сианитдор дар гузашта муддатҳои тулонӣ ҳамчун партовҳои зараровар дар назди корхона боқӣ мемонд ва ифтитоҳи коргоҳи нав ин мушкилотро аз байн бурд. Ҳамин гуна ба ҳамаи таъсиррасониҳои эҳтимолӣ ба экология бо ифтитоҳи ин коргоҳ нуқта гузошта шуд.
Пойгоҳи кислороди адсербтсионӣ низ барои пуррасозии давраи истеҳсолӣ дар ҷамъият нақши муҳим дошта, технологияи насбшуда дар коргоҳ имконият медиҳад, ки системаи автоклав бо оксигени фишурда таъмин гардад.
Дар маҷмӯъ дар Корхонаи металлургӣ раванди пурраи истеҳсолот аз бинои алоҳидаи маъмурӣ - идоравӣ ба таври ҳамешагӣ тариқи дастгоҳҳои муосиру камераҳои насбгардида назорат карда мешавад.
Корхонаи муштараки “Зарафшон” феълан коркарди конҳои “Таррор”, “Ҷилав”, “Олимпики”, “Хирсхона”, кони оҳаксанги “Даҳани мазор” ва регу шағали “Моғиёндарё”-ро ба роҳ мондааст. Барои истеҳсоли миси стандарти катодӣ кансентрати кони “Таррор” истифода бурда мешавад, ки барои фаъолияти мунтазаму босамари ин коргоҳ кони мазкур захираи зарурии ашёи хомро доро мебошад. Корҳои ҷустуҷӯиву геологӣ барои дарёфти сарчашмаҳои нави ашёи хом дар минтақаи мазкур бо ҷалби мутахассисон минбаъд роҳандозӣ карда мешавад. Ҳамчунин дар оянда ашёи хом барои коркард аз дигар конҳои ҳудуди ҷумҳуриву хориҷи кишвар низ ворид карда мешавад.
Корхонаи мазкур дар доираи амалишавии нақшаҳо дар роҳи расидан ба ҳадафи чоруми стратегӣ - “Саноаткунонии босуръати кишвар” бунёд гардида, дар он 300 нафар соҳиби ҷои кори доимӣ гардиданд. Бояд қайд кард, ки 97 фисади кормандони ширкат шаҳрвандони Ҷумҳурии Тоҷикистон буда, аксари онҳо таҷрибаи хуби кориро дар корхонаҳои азими Ҷумҳурии Мардумии Чин ва дигар давлатҳову корхонаҳои муқтадири ҳудуди ҷумҳурӣ аз бар намудаанд. Қайд кардан ба маврид аст, ки яке аз самтҳои муҳими фаъолияти ҷамъияти мазкур ин омодакуниву омӯзонидани мутахассисони маҳаллӣ ба шумор меравад.
Ин коргоҳи азими саноатӣ бо саҳми Ҳукумати Ҷумҳурии Тоҷикистон ва Ҷамъияти саҳомии пӯшидаи Корпоратсияи кӯҳкории “ЗИҶИН” бунёд гардидааст.
Иттилоъ дода шуд, ки муҷаҳҳазсозиву бунёди инфрасохтори зарурӣ дар ҳудуди ҷамъият ба хотири кори босамари корхонаҳои ҳудуди он пайваста анҷом дода мешавад. Полоишгоҳи рақами 3 барои фаъолият омода карда шуд, ки ин иншоот низ шуруъ аз имрӯз мавриди истифодабарӣ қарор гирифт.
Президенти Ҷумҳурии Тоҷикистон муҳтарам Эмомалӣ Раҳмон аснои боздид бунёди корхонаи нави истеҳсоли миси каттодиро дар самти роҳандозии коркарди ашёи хоми маҳаллӣ дар дохили мамлакат ва истеҳсоли маҳсулоти ниҳоӣ қадами муҳим арзёбӣ намуда, барои фаъолияти самаранок ба масъулин дастуру маслиҳатҳо доданд.
Дар назди корхонаи навбунёд Президенти мамлакат муҳтарам Эмомалӣ Раҳмон аз намоиши маҳсулоти Корхонаи муштараки “Зарафшон” боздид ба амал оварданд.
Дар намоишгоҳ маъданҳои конҳои “Таррор” ва “Ҷилав”, хокаи бойгардонидашудаи мис аз кони “Таррор”, тилло ва нуқраи истеҳсоли корхона ва миси катодӣ ба маъраз гузошта шуд.
Зимни боздид иброз гардид, ки феълан дар ҷамъияти мазкур 2809 нафар соҳиби ҷои кор буда, ҳамасола иқтидори истеҳсолӣ афзоиш дода мешавад.
Тибқи маълумоти масъулин дар 6 моҳи соли ҷорӣ Корхонаи муштараки “Зарафшон” ба маблағи зиёда аз 2,2 миллиард сомонӣ маҳсулот истеҳсол кардааст. Дар ин давра ҳамчунин истеҳсоли хокаи бойгардонидашуда 23,1 ҳазор тоннаро ташкил дод ва ин нишондод дар ҳамин давраи соли гузашта ба 18,4 ҳазор тонна баробар буд.
Зимни боздид аз намоишгоҳ Пешвои муаззами миллат муҳтарам Эмомалӣ Раҳмон барои фаъолияти мунтазами корхонаи нав, истеҳсоли маҳсулоти баландсифату рақобатпазир ва марҳила ба марҳила афзоиш додани иқтидори истеҳсолӣ масъулинро муваззаф намуданд.
08 июля 2023 .
5 июл дар доираи сафари корӣ дар ноҳияи Айнӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз намоиши маҳсулоти кишоварзӣ дар деҳоти Урметан дидан карда, бо деҳқонону сокинон суҳбати самимӣ анҷом доданд.
Кишоварзони ноҳияи Айнӣ дастовардҳои меҳнатӣ, аз ҷумла меваю хушкмеваҳо, асал, намудҳои гуногуни ғалладонагӣ, ки ҳамасола аз заминҳои зархези дар ихтиёрдошта истеҳсол мекунанд, ба маъраз гузоштанд.
Як гӯшаи намоишгоҳро намунаи маҳсулоти нонӣ ва хӯрокҳои миллӣ ташкил медод.
Дар ноҳияи Айнӣ 1360 хоҷагии деҳқонӣ фаъолият менамояд ва кишоварзон бо истифодаи мақсадноки заминҳо баробари таъмини бозори маҳаллӣ бо маҳсулоти тару тоза, дар дастрасии сокинони ноҳияҳои атроф бо маводи худӣ саҳми назаррас доранд.
Ноҳияи Айнӣ барои парвариш ва истеҳсоли картошкаи хушсифати навъҳои тоҷикӣ иқлими мусоид дошта, ҳамасола майдони кишти он васеъ карда мешавад.
Имсол низ дар ин самт меҳнаткашони ноҳия пешсаф буда, барои таъмини бозори минтақа ва истеҳсоли маҳсулоти хушсифат масъулият доранд. Ноҳияи Айнӣ минтақаи аграрӣ буда, саҳми деҳқононаш дар таъмини амнияти озуқавории кишвар ва истеҳсоли маҳсулоти баландсифати аз ҷиҳати экологӣ тоза неку муассир аст.
Ба Сарвари давлат муҳтарам Эмомалӣ Раҳмон иттиллоъ дода шуд, ки соли равон кишоварзони ноҳияи Айнӣ бо истифода аз ҳавои мусоид ва имкониятҳои мавҷуда майдони кишти зироати гуногунро ба маротиб зиёд намуда, дар майдони 605 гектар картошка, 67 гектар сабзавот ва 465 гектар ғалладонагиҳо гузарониданд, ки дар натиҷаи нигоҳубини хуб ва риояи қоидаҳои агротехникӣ ҳосили дилхоҳ низ ба даст оварданд.
Аҳли заҳмати ноҳия то имрӯз дар 41 гектар кишти такрорӣ гузарониданд, ки айни ҳол нашъунамои зироат хуб мебошад.
Пешвои муаззами миллат муҳтарам Эмомали Раҳмон зимни суҳбат бо аҳли заҳмат таъкид намуданд, ки кишоварзон бояд аз гузашта дида пурмасъул бошанд ва истифодаи самараноки заминро хуб дарк карда, бо ба даст овардани маҳсулоти фаровон дар таъмини амнияти озуқавории кишвар саҳми муносиби худро гузоранд.
Президенти мамлакат муҳтарам Эмомалӣ Раҳмон зимни боздид аз намоишгоҳ ва суҳбат бо аҳли заҳмати ноҳия ба дарки баланди масъулиятшиносӣ ва дастгирии меҳнаткашон аз сиёсати пешгирифтаи роҳбарияти Ҳукумати мамлакат изҳори сипос намуда, ба деҳқонон ҷиҳати истифодаи самараноки замин ва бардошти ҳосили дилхоҳ дастуру маслиҳатҳои муфид доданд.
Дар навбати худ аҳли заҳмати ноҳия аз таваҷҷӯҳи Сарвари давлат нисбат ба замину деҳқон изҳори миннатдорӣ намуда, ваъда доданд, ки минбаъд низ дар таъмини бозори дохила бо маҳсулоти ватанӣ саҳми арзандаи худро мегузоранд.
