Иқтибос аз Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 26.12.2018 | Мо соли ҷорӣ бо мақсади бартараф намудани санҷишҳои беасосу такрорӣ ва фароҳам овардани фазои мусоид барои рушди соҳибкорӣ ба ҳама гуна санҷишҳои фаъолияти соҳибкорони истеҳсолӣ дар давоми ду сол мораторий эълон намудем, ки аз он қариб 2000 субъектҳои соҳибкорӣ дар соҳаҳои истеҳсолӣ бархурдор гардиданд. | Барои тақвият бахшидан ба ин раванд, зарур мешуморам, ки солҳои 2019-2020 тамоми санҷишҳои фаъолияти субъектҳои соҳибкорӣ дар соҳаҳои истеҳсолӣ манъ карда, муқаррароти Қонуни Ҷумҳурии Тоҷикистон “Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ” ба ҳамаи мақомоти санҷишу назорат ва ҳифзи ҳуқуқ, аз ҷумла Прокуратураи генералӣ, Палатаи ҳисоб, Агентии назорати давлатии молиявӣ ва мубориза бо коррупсия, Бонки миллӣ ва мақомоти андозу гумрук татбиқ карда шаванд. | Ба роҳ мондани муборизаи қатъӣ бо амалҳои коррупсионӣ шарти муҳимми фароҳам овардани фазои ҳамдигарфаҳмӣ дар ҷомеа ва таҳкими эътимоди мардум нисбат ба сохтору мақомоти давлатӣ мебошад. | Бинобар ин, Агентии назорати давлатии молиявӣ ва мубориза бо коррупсия, Палатаи ҳисоб, Прокуратураи генералӣ ва дигар субъектҳои ваколатдори соҳа бояд ҳамкориро бо аҳолӣ беҳтар ба роҳ монда, ҷиҳати гузоштани садди устувор дар роҳи амалҳои коррупсионӣ тадбирҳои муассир андешанд. | Ҳамзамон бо ин, якҷо бо Вазорати адлия лоиҳаи Қонуни Ҷумҳурии Тоҷикистон “Дар бораи мубориза бар зидди коррупсия”-ро, ки соли 2005 қабул шудааст, вобаста ба шароити имрӯза дар таҳрири нав таҳия ва пешниҳод намоянд. | Таъмин намудани тартиботи ҳуқуқӣ, амнияти давлат, суботу оромии ҷомеа, ҳифзи ҳуқуқу озодиҳои инсон ва шаҳрванд, инчунин, мубориза бо ҷинояткорӣ вазифаи бевоситаи хизматӣ ва қарзи виҷдонии ҳар як корманди мақомоти ҳифзи ҳуқуқ ба ҳисоб меравад. | Аз ин рӯ, тамоми кормандони мақомоти судӣ, прокуратура, корҳои дохилӣ, амният, агентиҳои назорати маводи нашъаовар, назорати давлатии молиявӣ ва мубориза бо коррупсия бо мақсади таъмин намудани тартиботи ҷамъиятӣ, суботу оромии ҷомеа, пешгирӣ ва сари вақт ошкор кардани ҷиноятҳо, муайян ва бартарафсозии сабабу омилҳои содиршавии онҳо чораҳои ҷиддӣ андешанд. | Барои расидан ба ин ҳадафҳо кормандони мақомоти ҳифзи ҳуқуқ бояд, пеш аз ҳама, худашон талаботи қонунҳоро дар кору фаъолияти хеш қатъиян риоя намоянд ва дар иҷрои вазифаҳои хизматӣ намунаи ибрат бошанд. |

Суханронӣ дар маросими ифтитоҳи Қасри фарҳанги деҳоти ба номи Ҳайдар Усмонови ноҳияи Бобоҷон Ғафуров

 

Муҳтарам аҳли фарҳанг!
Ҳозирини гиромӣ!

Ба истиқболи ҷашни сисолагии истиқлолияти давлатии Тоҷикистон ва дар доираи татбиқи чорабиниҳои солҳои рушди деҳот, сайёҳӣ ва ҳунарҳои мардумӣ дар деҳоти ба номи Ҳайдар Усмонови ноҳияи Бобоҷон Ғафуров мавриди баҳрабардорӣ қарор гирифтани майдони Парчами миллӣ, Кохи фарҳанг, беморхонаи муосир ва бинои ҷамоати деҳот далели возеҳи амалишавии ҳадафҳои созандаи Ҳукумати мамлакат, натиҷаи заҳмати содиқонаи мардум ва албатта, самараи неки истиқлолияти давлатӣ мебошад.

Мехоҳам махсус таъкид намоям, ки таваҷҷуҳи ҳамаҷонибаи Ҳукумати мамлакат ба соҳаи фарҳанг ҳамчун таҷассумгари симои маънавии халқ, воситаи эҳёи ойину ҷашнҳои миллӣ ва арзишҳои фарҳангӣ низ ба мо маҳз аз баракати истиқлолияту озодӣ муяссар гардидааст.

Дар даврони соҳибистиқлолӣ дар шаҳру ноҳияҳои гуногуни кишвар даҳҳо иншооти соҳа, аз ҷумла китобхонаву осорхонаҳо, қасру марказҳои фарҳанг бунёд гардида, ба истифода супорида шуданд, ки онҳо имрӯз ба сокинони мамлакат дар ҷодаи доир намудани чорабиниҳои мухталиф, баланд бардоштани завқи зебоишиносии мардум ва дар маҷмуъ, ба рушди фарҳанги миллӣ мусоидат карда истодаанд.

Соли 2020 ҷашни яке аз ёдгориҳои бостонии кишварамон - шаҳри қадимаи Саразм доир мегардад.

Ин чорабинӣ имкон медиҳад, ки мо фарҳанги беш аз 5500 - солаи халқамонро, ки аз ҷониби мутахассисону коршиносони маъруф ва доираҳои илмии бонуфузи ҷаҳон эътироф шудааст, ба ҷаҳониён ба таври шоиста муаррифӣ намоем.

Бори дигар таъкид месозам, ки ҳадафи асосӣ аз эълон гардидани солҳои 2019-2021 ҳамчун солҳои рушди деҳот, сайёҳӣ ва ҳунарҳои мардумӣ, пеш аз ҳама, ҳалли масъалаҳои иҷтимоии аҳолӣ бо роҳи беҳтар намудани вазъи инфрасохтор, яъне беҳсозии соҳаҳои маорифу тандурустӣ, фарҳанг, ба талаботи замони муосир мутобиқ гардонидани сатҳи хизматрасонӣ ва баланд бардоштани некӯаҳволии мардум дар ҳар як деҳа ва маҳалли аҳолинишин мебошад.

Дар ин раванд, ҳоло дар вилояти Суғд корҳои созандагиву ободгарона бомаром идома дошта, мо дар ҷараёни сафари кории худ чандин иншооти муҳимми истеҳсоливу иҷтимоиро ифтитоҳ намудем.

Қасри фарҳанг, ки чанд лаҳза пеш ифтитоҳ гардид, аз ҷумлаи ҳамин корҳои ободгарона буда, дар он китобхонаи замонавӣ, утоқҳои алоҳида барои фаъолияти маҳфилҳои гуногуни ҳунарӣ ва аз худ кардани ҳунарҳои мардумӣ бо тамоми таҷҳизоту шароити зарурӣ омода шудаанд.

Вобаста ба ин, ҳамаи сокинони деҳоти ба номи Ҳайдар Усмоновро ба муносибати ифтитоҳи иншооти навбунёди иҷтимоӣ, аз ҷумла қасри хуштарҳу замонавии фарҳанг табрик гуфта, ба мутахассисону коргароне, ки дар сохтмони онҳо саҳм гузоштаанд, бахусус, ба ташаббускорону сармоягузорон миннатдории самимӣ изҳор менамоям. 

Ҳамчунин, хотиррасон месозам, ки роҳбарону масъулон ва кормандони соҳа бояд бо истифода аз шароиту имкониятҳои мусоид барои ҳифзу нигаҳдории арзишҳои пурқимати маънавӣ ва тараққиёти минбаъдаи фарҳанги миллӣ кӯшиш намоянд.

Зеро тайи чанд соли охир дар аксари шаҳру навоҳии вилоят қасру марказҳои фарҳанг бунёд гардида, таъмиру таҷдиди даҳҳо иншооти мавҷудаи соҳа бомаром идома дорад.

Танҳо соли гузашта дар ноҳияи Шаҳристон Қасри фарҳанг ва дар шаҳри Истаравшан амфитеатри муосир, ки дар минтақа калонтарин ба ҳисоб меравад, мавриди баҳрабардорӣ қарор дода шуд.

Тибқи нақшаи чорабиниҳои тасдиқшуда то ҷашни 30-солагии истиқлолияти давлатии Тоҷикистон дар ҳудуди вилояти Суғд 20 иншооти нави соҳаи фарҳанг бунёд ва 139 муассиса таъмиру таҷдид карда мешавад.

Дар баробари ин, хотирнишон месозам, ки вазъи баъзе иншооти соҳа ва фаъолияти театрҳои касбии вилоят беҳбудӣ металабад.

Инчунин, зарур аст, ки ба масъалаи фаъолияти муназзами китобхонаҳо дар ҳамаи шаҳру ноҳияҳои вилоят, баргузории озмунҳои мухталифи фарҳангиву маърифатӣ, аз ҷумла мусобиқаҳои адабиву китобхонӣ ҳамчун воситаи ҷалби васеи ҷавонону наврасон ба фарҳангу маърифат, баланд бардоштани ҳисси миллӣ, ифтихори ватандорӣ ва завқи зебоипарастии онҳо эътибори ҷиддӣ дода шавад.

Бо ин мақсад истифодаи самараноки маҷмааи фарҳангу фароғат, ки дар маркази ноҳия бунёд шудааст, инчунин, осорхонаи ҷумҳуриявии ба номи академик Бобоҷон Ғафуров, боғи фарҳангу фароғати ба номи Абӯабдуллоҳи Рӯдакӣ ва қариб сад ёдгории таърихиву фарҳангии ноҳия бисёр муҳим мебошад.

Алҳол мардуми кишвар дар марҳалаи омодагӣ ба ҷашни бузурги миллӣ - сисолагии истиқлолияти давлатии Тоҷикистон қарор доранд.

 Бо мақсади омодагии ҳамаҷониба ва дар сатҳи баланд истиқбол гирифтани ин санаи таърихӣ дар ноҳияи Бобоҷон Ғафуров бунёди беш аз 1200 иншооти мухталифи иҷтимоиву иқтисодӣ ба нақша гирифта шуда, то имрӯз, аллакай, як қатор корҳо амалӣ гардидаанд.

Ноҳияи Бобоҷон Ғафуров яке аз ноҳияҳои калонтарини аграриву саноатии кишвар мебошад.

Сокинони ноҳия, бахусус, дар парвариши пахта ва истеҳсоли меваю сабзавот таҷрибаи зиёд доранд.

Бо дарназардошти мунтазам афзоиш ёфтани аҳолӣ ва зиёд шудани талабот ба маҳсулоти озуқа, инчунин, вазъи бозорҳои ҷаҳонӣ кишоварзону мутахассисони ноҳия бояд бо истифода аз таҷрибаву дониш, обу замин ва дигар захираву имкониятҳо ҳарчи бештар маҳсулот истеҳсол намоянд, коркард ва ба содирот баровардани маҳсулоти тайёрро афзоиш диҳанд.

Дар ин росто зарур аст, ки ба масъалаи таъсиси коргоҳу корхонаҳои нави истеҳсолӣ ва муҳайё кардани ҷойҳои нави корӣ эътибори аввалиндараҷа дода шавад.

Бовар дорам, ки мардуми ноҳия аз уҳдаи иҷрои ҳама гуна амалҳои нек сарбаландона мебароянд ва барои истиқболи сазовори ин ҷашни бузурги миллӣ саҳми арзишманди худро мегузоранд.

Бори дигар ҳамаи шумо, ҳозирини арҷманд ва тамоми сокинони ноҳияи Бобоҷон Ғафуровро ба муносибати ифтитоҳи Қасри фарҳанг табрик гуфта, ба ҳар яки шумо саломативу саодати рӯзгор ва комёбиҳои нав орзу менамоям!

Ҳамеша муваффақу сарбаланд бошед!


Сомонаи расмии
Президенти Ҷумҳурии Тоҷикистон

Сомонаи расмӣ Прокуратураи генералии
Ҷумҳурии Тоҷикистон

Вазорати корҳои дохилии
 Ҷумҳурии Тоҷикистон

Агентии назорати нашъовари назди
Презтиденти Ҷумҳурии Тоҷикистон

Кумиати андози назди Ҳукумати
Ҷумҳурии Тоҷикистон

 

ХАДАМОТИ ГУМРУКИ НАЗДИ ҲУКУМАТИ
ҶУМҲУРИИ ТОҶИКИСТОН

 

Агентии Миллии иттилоотии
Тоҷикистон "Ховар"

 

Палатаи савдо ва саноати
Ҷумҳурии Тоҷикистон

 

Маркази миллии қонунгузории назди
Президенти Ҷумҳурии Тоҷикистон< /a>

 

© АГЕНТИИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯИ ҶУМҲУРИИ ТОҶИКИСТОН , 2013-2019.